Sunday, March 21, 2010

სპორტული აქტიურობები

ზამთრის მკვდარი სეზონის შემდეგ ,რომელის ერთადერთი გასართობი საშუალება კინოთეატრების მიერ შემოთავაზებულ ფილმებზე სიარული და მეგობრების წრეში ლუდის სმა იყო - სპორტული აქტიურობების თემამ წინა პლანზე წამოიწია. დიდი ხანია მე და ჩემს მეგობრებსაც გვაწუხებს ის საკითხი- თუ როგორ და სად შეიძლება დაკავდე ისეთი გასართობი საქმიანობით, რომელიც ფიზიკურ აქტიურობას შეიცავს.
აი რამდენიმე მათგანი, რაც მოვიფიქრეთ ან რასაც ვაპირებთ

ბოულინგი&ტენისი
 კარგი იქნებოდა აქამდეც მოგვეფიქრებინა, მაგრამ სამწუხაროდ მხოლოდ წინა კვირაში გაუჩნდა ერთერთ ჩვენგანს მორიგი ”რა გავაკეთოთ”-ზე ფიქრის შემდეგ -წყნეთის გასართობ ცენტრში წასვლის იდეა. სიმართლე გითხრათ არ მეგონა ბოულინგი ასე თუ მომეწონებოდა. მართალია დიდ აქტიურობას არ მოითხოვს, ვფიქრობ მაინც არის გარკვეულწილად ვარჯიში. ბოლოსდაბოლოს მკლავის კუნთები ხო მაინც ვარჯიშდება 6-8-9 კილოიანი ბურთების აწევა-გაგორებით. ამავე ცენტრში აღმოვაჩინეთ ტენისის მაგიდა და დღეს ამ სახეობაშიც მოვსინჯეთ ძალები. მინდა ვთქვა რომ უდაოდ გაამართლა , რადგან ახლა სასიამოვნოდ დაღლილად ვგრძნობ თავს.

 ველოსიპედი
ჩემს წინა პოსტებში და საახალწლო საჩუქრების ნუსხაშიც არაერთხელ ვახსენე ველოსიპედის ყიდვის სურვილი . სურვილი სამწუხაროდ ისევ სურვილად რჩება , თუმცაღა ისეთ სურვილად, რომელიც აუცილებლად ასრულდება. მიხარია რომ ჩემმა მეგობრებმა დღეს ეს სურვილი აისრულეს- ასე რომ მალე შეიძლება ველოსიპედისტების ერთ დიდ გუნდად გადავიქცეთ :)
რათქმაუნდა ამ ამბავს მოჰყვება პატარ-პატარა წინააღმდეგობები :”შენ კიდევ ეგ გინდა, ცხვირ-პირს დაიმტვრევ” და ა.შ, მაგრამ ეს ყველაფერი გადალახვადია !!!


ცურვა
დიდიხანია ვგეგმავ ცურვაზე სიარულს, ამჯერად ველოდები სითბოს ! ნელნელა უნდა დავიწყო საცურაო პირობების და ფასების გაგება და საუკეთესო ვარიანტის არჩევა. ვნახოთ რა გამოვა. ზემოთნახსენებ წყნეთის კომპლექსში დღეს აუზიც ვიხილეთ, მშვენიერი პირობებია - აუზი+საუნა+ტრენაჟორები. 1 საათი 15 ლარი ღირს. ერთი საათი ჩემთვის ძალიან ცოტაა , მაგრამ რუსთაველში ”Dear John"-ის ნახვას ნამდვილად ჯობს !

ლაშქრობები
ამინდის გამოსვლასთან ერთად -ახლოვდება ლაშქრობების სეზონის გახსნაც, რაც მე ძალიან მახარებს და იმედი მაქვს ამ მხრივ ეს წელი განსსაკუთრებით დატვირთული იქნება, რადგან ახლა მაინც ვისვენებ შაბათ-კვირას.

*
მოკლედ ალბათ მიხვდით რომ ძალიან მონდომებული ვარ და იმედი მაქვს ეს მონდომება არ გამიქრება დათბობასთან ერთად. ძალიან მინდა სპორტული მაშასადამე ჯანსაღი ცხოვრებით ცხოვრება. საკუთარ თავზე ბევრჯერ გამომიცდია - როცა ფიზიკურად იხარჯები  და მთელ დღეს ერთ ადგილას არ ზიხარ, მაშინ უფრო მეტი ენერგია და ხალისი გაქვს!
*
მაინტერესებს კიდევ ა რა შეიძლება გააკეთოს ადამიანმა თბილისში ან მის შემოგარენში სპორტული აქტიურობების კუთხით და თქვენ რამდენად ხართ დაკავებული ან რამდენად გაწუხებთ ეს თემა?