მამა ღმერთი კი არ ვარ...

მას შემდეგ რაც უმუშევარი დავრჩი ჩემი ყოველი დილა ვაკანსიების საიტებზე შესვლით იწყება. საკმაოდ კრიტიკული ვარ საკუთარი თავის მიმართ და ხშირად არ ვაგზავნი CV-ს თუ დარწმუნებული არ ვარ , რომ შევძლებ.
თითქმის ყოველდღე ვაწყდები ისეთ ვაკანსიებს , რომლებიც მაოცებენ და მაშფოთებენ. გარდა იმისა რომ ვაკანსიის დასახელება ხშირად არ შეესაბამება ჩამოთვლილ მოთხოვნებს , ხშირად მოთხოვნები ადამიანური შესაძლებლობების საზღვრებს თითქმის სცილდებიან.

მოდით მაგალითისთვის განვიხილოთ ერთერთი კომპანიის "ოფისის მენეჯერის" ვაკანსია:

  1.კლიენტებთან ურთიერთობა: მიღება / გადამისამართება;
  2.სატელეფონო ზარების პასუხი / გადამისამართება;
  3.ორგანიზაციის Twitter / Facebok / WEB გვერდების მართვა;
  4.საჭიროების შემთხვევაში თარგმნა;
  5.საბუღალტრო საბუთების გამოწერა / მოწესრიგება;
  6.სტატისტიკის წარმოება;
  7.ოფისის მომარაგება;
  8.ოფისისთვის სხვა აუცილებელი საქმიანობა.

ჩამოთვლილთაგან პირველ, მეორე და ბოლო პუნქტს მივაკუთვნებდი ოფისის მენეჯერის ფუნქცია–მოვალეობებს, რაც შეეხება თარგმნას– ეს მთარგმნელის საქმეა, საბუღალტრო საბუთების გამოწერა– ბუღალტრის, სტატისტიკის წარმოება– ან HR-ის ან გააჩნია სტატისტიკას, ოფისის მომარაგება– ოფისის მომმარაგებლის, ხოლო Twitter / Facebok / WEB გვერდების მართვა– ან ახალი მედიის სპეციალისტის (რომელიც ნელნელა უკვე მკვიდრდება , როგორც თანამდებობა) ან ვებგვერდის მმართველის ან PR-ის.

გასაგებია, შეიძლება პატარა კომპანიებს არ აქვს იმდენი საშუალება, რომ ამდენი კადრი აიყვანოს, მაგრამ ნამუსიც ხომ კარგი საქონელია? შეიძლება ბევრმა მითხრას შენ არ გინდა , სხვა გაატარეო, მაგრამ აქ ჩემზე არაა, არც იმაზე, რომ მე შეიძლება სრულიად ვაკმაყოფილებ ყველა პუნქტს, უბრალოდ მსგავსი ვაკანსიის გამომცხადებელ კომპანიაში მუშაობის არანაერი სურვილი არ მაქვს.

გავეცნოთ კიდევ ერთ მაგალითს

ადმინისტრაციული თანაშემწის პოზიციაზე ერთ-ერთი კომპანიისთვის

ძირითადი მოვალეობები ( ფრჩხილებში ვუთითებ ჩემს შენიშვნებს)

• საქმიანი მიმოწერის წარმოება კომპანიის პარტნიორებთან, ინვესტორებთან, სერვისის მომწოდებლებთან;
• სათაო ოფისისთვის ყოველთვიური ანგარიშის მომზადება
• ხელშეკრულებების გაფორმება სერვისის მომწოდებლებთან (სადაზღვევო კომპანია, მობილური ოპერატორი, სასტუმრო და სხვა).
• მუდმივი მონიტორინგი მათ მიერ მოწოდებული სერვისის გამართულ მუშაობაზე, კონტრაქტით გათვალისწინებული ვალდებულებების შესრულებაზე;
• სამთავრობო შეხვედრების ოქმების შედგენა (ინგლისურად და ქართულად);
• თანამშრომლებთან შრომითი კონტრაქტების გაფორმების ორგანიზება; (HR-ის საქმეა)
• საჭიროების შემთხვევაში პრეს-რელიზის, ინფორმაციული და სარეკლამო სტატიის მომზადება; (PR-ის საქმეა)
• მედიასთან ურთიერთობა; (PR-ის საქმეა)
• სარეკლამო მასალის დამზადების ორგანიზება;
• კომპანიის ვებ გვერდის შექმნაში, დახვეწაში მონაწილეობის მიღება;(მონაწილეობის მიღებას კიდე არაუშავს, იმედია ინფორმაციის დაწერასაც არ მოსთხოვენ და მართვას)
• საქართველოში კომპანიის წარმომადგენლის შეხვედრების და თათბირების ორგანიზება;
• უცხოელი სტუმრების დახვედრის ორგანიზება; (ოფისმენეჯერი)
• კორესპონდენციის მონიტორინგი და დაარქივება;
• კომპანიის წარმომადგენლის მივლინებების ორგანიზება; (HR-ის საქმეა)
• წერილობითი თარგმანის უზრუნველყოფა ინგლისურიდან ქართულად და პირიქით; (წინა განცხადებაში ეს ოფისის მენეჯერს ევალებოდა :)
• თანამშრომელთა შინაგანაწესის პერიოდული დახვეწა და მათი მხრიდან წესების დაცვის კონტროლი; (HR-ის საქმეა)

მაპატიეთ , მაგრამ გულწრფელად მაინტერესებს მთელი ორგანიზაცია ეს ერთი კაცი უნდა იყოს? აბა სხვები რას აკეთებენ?
პრინციპში რაღა ვთქვა, ალბათ იმაზეც მადლობა უნდა ვთქვათ , რომ წინასწარვე გვაფრთხილებენ და გვამზადებენ ექსპლუატაციისთვის.